Adil Mirzəyev, Zahir Məmmədli və Mustafa Əliyevdən, Sabirabad, Azərbaycan

Hörmətli cənab Prezident.

Sizin uzaqgörən, məqsədyönlü xarici və daxili siyasətiniz nəticəsində dövlətimiz böyük uğur və nailiyyətlər əldə etmiş, Azərbaycan iqtisadi cəhətdən dünyanın ən güclü ölkələrindən birinə çevrilmişdir. Bütün respublika əhalisi kimi biz sabirabadlılar da bununla fəxr edir və böyük qürur hissi duyuruq.

Sizin diqqət və qayğınız sayəsində respublikanın digər regionlarında olduğu kimi, Sabirabad rayonunda da yol-nəqliyyat infrastrukturunun yaxşılaşdırılması, avtomobil yollarının yenidən qurulması ilə bağlı bir sıra layihələr həyata keçirilmişdir. Həmin layihələr çərçivəsində rayonun inzibati ərazisindən keçən respublika və yerli əhəmiyyətli, eləcə də şəhərdaxili və kəndlərarası avtomobil yolları əsaslı təmir olunaraq vətəndaşların istifadəsinə verilmişdir.

Bildiririk ki, Sabirabad rayonu ərazisində yol-nəqliyyat infrastrukturunun yaxşılaşdırılması məqsədilə həyata keçirilmiş bütün layihələr rayon əhalisi tərəfindən geniş rəğbət və minnətdarlıq hissi ilə qarşılanır.

Sizin “Sabirabad şəhərində avtomobil yollarının əsaslı təmiri ilə bağlı tədbirlər haqqında” Sərəncamınıza uyğun olaraq Ulu Öndər Heydər Əliyevin adını daşıyan prospektdə, Muğan prospektində və şəhərin bir sıra küçələrində əsaslı təmir işləri aparılmışdır. Bu da 15 İyun – Milli Qurtuluş Günündə Sabirabad rayonunun əhalisi üçün böyük töhfə olmuşdur.

Cənab Prezident, Sabirabad rayonunda yol-nəqliyyat infrastrukturunun yaxşılaşdırılması məqsədilə həyata keçirilmiş işlərə görə bütün sakinlər adından Sizə öz dərin minnətdarlığımızı bildiririk. Sizə uzun ömür, möhkəm cansağlığı, Azərbaycanın siyasi və iqtisadi cəhətdən daha da qüdrətli bir dövlətə çevrilməsi istiqamətində apardığınız məqsədyönlü, uzaqgörən xarici və daxili siyasi fəaliyyətinizdə yeni-yeni uğurlar arzu edirik.

Hörmətlə,

Mirzəyev Adil Kamran oğlu,

Məmmədli Zahir Rasim oğlu,

Əliyev Mustafa Nadir oğlu.

Azərbaycan Respublikası, Sabirabad şəhəri.