Neapol-Bakı Assosiasiyasından, Neapol, İtaliya

Möhtərəm cənab Prezident!

Sizi – müstəqil Azərbaycanı firavan gələcəyə, böyük perspektivlərə doğru aparan, hər bir azərbaycanlının Prezidenti olduğunu əməli fəaliyyəti ilə təsdiqləyən əziz dövlət başçımızı ilk dəfə Prezident seçildiyiniz gün münasibətilə səmimi-qəlbdən təbrik edirik.

Dünya azərbaycanlılarının fəxri, xalqımızın Ümummilli Lideri Heydər Əliyevin müstəqil Azərbaycanımızın hərtərəfli tərəqqisinə xidmət edən uzaqgörən siyasətini, eyni zamanda, ölkənin diaspor işinə göstərdiyi diqqət və qayğını Siz yüksək səviyyədə davam və inkişaf etdirirsiniz. Sizin düzgün düşünülmüş və məqsədyönlü siyasətiniz ölkəmizin hərtərəfli və dayanıqlı inkişafını, tərəqqi tempinə görə dünyada lider mövqeyə sahib olmasını təmin etmiş, regional və qlobal əhəmiyyətli mühüm layihələri reallaşdırmaq əzminiz dövlətimizə və planetin dörd bir tərəfində yaşayan soydaşlarımıza bütün dünyada yüksək nüfuz qazandırmışdır. Azərbaycanda bütün sahələr kimi, diaspor quruculuğunun da inkişafı ilə bağlı imzaladığınız sənədlər təkrarsız vətənpərvərliyin, dövlətçilik əqidəsinin, xalqa bağlılığın real ifadəsi olmaqla, xalqın Sizə - öz Prezidentinə inam və etibarını daim artırmaqdadır. Siz Azərbaycanın Lideri olmaqla Azərbaycanı da Cənubi Qafqazın liderinə çevirdiniz. Günəş həmişə Şərqdən doğur və bu gün Sizin Prezidenti olduğunuz doğma Azərbaycanımız da dünyaya Şərqdən doğan bir günəş kimidir.

Qırx dörd günlük Vətən müharibəsində “dəmir yumruq” sayəsində düşmən üzərində qazanılan inamlı Qələbə xalqımıza bir daha məğrurluq hissini yaşatdı. Bu hisslər Azərbaycandan kənara yayılaraq dünyanın dörd bir tərəfində yaşayan və diaspora halında təşkilatlanan hər bir azərbaycanlının gücünə güc qatdı. Biz də, İtaliyada fəaliyyət göstərən və əsasən azərbaycanlılardan ibarət diaspor təşkilatı kimi hər zaman Sizə və yürütdüyünüz siyasətə dəstək vermişik və bundan sonra da dəstək verməyə hazırıq.

Əziz Prezidentimiz, Sizi bütün diaspor təşkilatları və dünya azərbaycanlıları adından bir daha ürəkdən təbrik edir, Sizə möhkəm cansağlığı, uzun ömür, Azərbaycanın dünyanın ən xoşbəxt diyarına çevrilməsi, ölkəmizin etibarlı gələcəyi naminə apardığınız siyasətdə yeni-yeni uğurlar diləyirik. Sizin, hər açılan sabaha ailənizlə, xalqımızla birgə daim fərəhli duyğularla, sevinclə qədəm qoymağınızı arzulayırıq.

Sağ olun ki, Siz varsınız!

Yaşasın Azərbaycan!

Dərin hörmətlə,

Neapol-Bakı Assosiasiyası

İtaliya, Neapol şəhəri.