Sevda Məmmədəliyevadan, Bakı, Azərbaycan

Möhtərəm cənab Prezident.

Azərbaycan Respublikası Prezidentinin fərdi təqaüdünə layiq görüldüyüm üçün Sizə öz dərin minnətdarlığımı bildirirəm.

Uzun illər ərzində Azərbaycan dövlətinə, Azərbaycan mədəniyyətinə, elminə, təhsilinə xidmət etdiyim üçün özümü çox xoşbəxt sanıram.

Böyük fəxrlə qeyd etmək istəyirəm ki, mənə göstərilən böyük etimada görə hədsiz qürur hissi keçirirəm. Azərbaycan xalqının Ümummilli Lideri Heydər Əliyevin doğum günündə dahi öndərin əziz xatirəsi qarşısında dərin ehtiramla baş əyirəm.

Siz Azərbaycan Respublikasının Prezidenti seçildiyiniz ilk gündən mədəniyyət sahəsini dövlət siyasətinin əsas prioritetlərindən biri kimi diqqət mərkəzində saxlamış, Azərbaycan xalqının varlığını özündə yaşadan mənəvi-intellektual irsə, ziyalılara, elm və mədəniyyət xadimlərinə yüksək həssaslıqla yanaşmısınız. Sizin xüsusi diqqət və qayğınızı mən daim öz üzərimdə hiss etmişəm. Məhz Sizin və Azərbaycan Respublikasının Birinci vitse-prezidenti Mehriban xanım Əliyevanın böyük dəstəyi sayəsində fəaliyyətimi uğurla davam etdirmək mənə nəsib olmuşdur. Sizin səmimi, həssas, qayğıkeş münasibətiniz mənim üçün ölçüyəgəlməz dəyərə malikdir. Sizin sərəncamlarınız ilə 3-cü və 2-ci dərəcəli “Vətənə xidmətə görə" ordenləri ilə təltif olunmağım və fərdi təqaüdə layiq görülməyim mənim fəaliyyətimə verilən yüksək qiymətdir. Əmin ola bilərsiniz ki, ömrümün sonunadək Vətənimə, xalqıma, dövlətimə şərəflə xidmət edəcəyəm.

Möhtərəm cənab Prezident.

Bir daha Sizə öz dərin minnətdarlığımı bildirir, möhkəm cansağlığı, uzun ömür, xoşbəxtlik, müstəqil Azərbaycanımızın nurlu sabahı, ümummilli qayələrimizin gerçəkləşməsi naminə ali dövləti fəaliyyətinizdə möhtəşəm uğurlar diləyirəm.

Dərin hörmət və ehtiramla,

Sevda Məmmədəliyeva,

Azərbaycan Milli Elmlər Akademiyasının müxbir üzvü, fəlsəfə elmləri doktoru, professor.

Azərbaycan Respublikası, Bakı şəhəri.