Qrant müsabiqəsinin qalibindən, Qəbələ, Azərbaycan

Möhtərəm Prezident, Müzəffər Ali Baş Komandan.

“İdeyanı Reallaşdır 2023” Gənclərin Fərdi Layihələri üzrə Qrant Müsabiqəsinə təqdim etdiyim “Şanlı qələbəmizə gedən yol” layihəsi qalib olub və tədbirlərimizin Qəbələ və İsmayıllı rayonlarında keçirilməsi nəzərdə tutulub. Məqsədim Sizin rəhbərliyinizlə Azərbaycan Ordusunun hərb tarixinə qızıl hərflərlə yazdığı şanlı qələbənin mahiyyətinin gənc nəsil arasında təbliği, Azərbaycanın ərazi bütövlüyü uğrunda döyüşlərdə şəhid olmuş hərbçilərimizin, qazilərimizin cəmiyyətə tanıdılması, yeniyetmə və gənc nəslin milli köklərimizə bağlılıq, vətənpərvərlik, dövlətçiliyə sədaqət ruhunda tərbiyə olunması üçün təlim və tədbirlərin keçirilməsindən ibarətdir. Sizin gənclərə dəstək və diqqət göstərməyinizin nəticəsidir ki, bu gün Azərbaycan gəncliyində özünə, öz gücünə, istedadına inam hissi artıb. Bu, hər bir Azərbaycan gəncində, eyni zamanda, onların bu ölkə üçün dəyərli vətəndaş olmaları inamını daha da gücləndirib.

Əsası Ulu Öndər Heydər Əliyev tərəfindən qoyulan siyasi kurs bu gün Sizin tərəfinizdən uğurla davam etdirilir. Ölkəmizdə həyata keçirilən gənclər siyasəti, bu sahədə atılan addımlar və qəbul olunan qərarlar gələcəyə hesablanmış uğurlu strategiyanın təzahürüdür. İlk növbədə, birmənalı olaraq qeyd etmək lazımdır ki, Sizin tərəfinizdən davam etdirilən gənclər siyasəti Azərbaycanda həyata keçirilən və bütün digər sahələri də əhatə edən ümumi inkişaf strategiyasının mühüm tərkib hissəsidir. Əgər Azərbaycan gəncliyi bu gün ölkənin ictimai həyatının bütün sahələrində aktiv fəaliyyəti ilə seçilirsə, siyasi, iqtisadi, humanitar, sosial layihələrin həyata keçirilməsində mühüm rol oynayırsa, bu, birbaşa dövlət gənclər siyasətinin effektivliyinin göstəricisidir.

Müzəffər Ali Baş Komandanımız, daim uca olasınız. Biz gənclərə göstərilən diqqətə, qayğıya, dəstəyə görə, ilk növbədə, Sizə və Mehriban xanım Əliyevaya minnətdarlığımızı bildiririk.

Ölkəmizin inkişafı və xalqımızın rifahı naminə fəaliyyətinizdə Uca Allah Sizə yardımçı olsun.

Hörmətlə,

Məmmədəliyev Xəyal İlham oğlu.

Azərbaycan Respublikası, Qəbələ rayonu, Nic qəsəbəsi.