Daşlı Yataq kəndinin sakinlərindən, Şabran, Azərbaycan

Hörmətli cənab Prezident.

Sizin sayənizdə qələbələr qazanan, hər zaman inkişafda olan Azərbaycan dünyanın diqqət mərkəzindədir. Sizin xalqı düşünərək yürütdüyünüz siyasət, milli mənafe ideyasını qoruyub inkişaf etdirməniz hər zaman ölkəmizi uca zirvələrə qaldırır.

Buna görə də bütün hallarda ümid yerimiz Sizsiniz. Yaşadığımız Şabran rayonunun Daşlı Yataq kəndinə gedən yol daşlı-kəsəkli idi, illər keçdikcə bu yolda gediş-gəliş də çətinləşirdi. Kəndimizin sakinləri yol problemi ilə əlaqədar Sizə müraciət etməyə qərar verdi. Müraciətimizdən qısa müddət sonra Sizin tapşırığınızla Daşlı Yataq kəndinə gedən yol abadlaşdırılaraq asfalt örtük döşənib. Hazırda yaşadığımız kəndin yol problemi öz müsbət həllini tapdığına görə insanların piyada və avtomobillə hərəkəti olduqca asanlaşıb, sakinlər iş yerlərinə, xəstəxanaya və digər bütün istiqamətlərə rahatlıqla gedib-gələ bilirlər.

Ölkəmizdə aparılan uğurlu infrastruktur quruculuğu prosesi çoxşaxəli istiqamətləri əhatə edir. Bu sahədə görülən işlər hər zaman Sizin diqqət mərkəzinizdədir. Müasir yolların salınması insanların rahatlığı, vətəndaş məmnunluğunun təmin olunması deməkdir.

Cənab Prezident, yaşadığımız kəndin yol probleminin həllinə görə Sizə kənd sakinləri adından təşəkkür edirik. Çox sağ olun.

Hörmətlə,

Mütəllimov Sahib,

Axundov Elxan,

Bağırova Saniyə,

Cəbrayılov Mübariz və başqaları (10 nəfər).

Azərbaycan Respublikası, Şabran rayonu, Daşlı Yataq kəndi.