Oruc Cabbarovdan, Ağdam, Azərbaycan

Hörmətli cənab Prezident.

Bugünkü müasir, inkişaf etmiş, qalib Azərbaycan Sizin şah əsərinizdir. Sizin Azərbaycan xalqı üçün etdiyiniz fədakarlıqlara görə ölkəmizin hər bir sakini Sizə yüksək ehtiram və dərin minnətdarlıq hissi bildirir.

Həm məcburi köçkün, həm də Qarabağ müharibəsinin qazisi kimi ölkəmizdə müharibə əlillərinə, qazi və şəhid ailələrinə olan dövlət qayğısından çox razıyam, bu qayğı hər zaman bizi qürurlandırır. Qarabağda aparılan quruculuq işləri də qəlbimizi fərəh hissləri ilə doldurur. Sizin və Mehriban xanım Əliyevanın mütəmadi olaraq şəhid ailələri, müharibə əlilləri və Vətən müharibəsi qəhrəmanları ilə görüşü, onlara qayğı göstərməsi bir ənənəyə çevrilib.

Cənab Prezident, neçə vaxt idi ürək xəstəliyindən əziyyət çəkirdim. Sizə və Mehriban xanıma müraciətimdən sonra əməliyyat olundum. Səhiyyəmizin yüksək inkişafı, həkimlərimizin səyi nəticəsində əməliyyat çox uğurlu keçdi və həyata qayıtdım. Bu diqqət və qayğıya görə Sizə və Mehriban xanıma səmimi minnətdarlığımı bildirir, gələcək fəaliyyətinizdə uğurlar arzulayıram.

Hörmətlə,

Cabbarov Oruc,

Qarabağ müharibəsinin əlili.

Azərbaycan Respublikası, Ağdam rayonu.