Azərbaycanlı elm adamlarından, Ankara, Türkiyə

Hörmətli cənab Prezident.

Yola saldığımız sentyabr ayı biz – xaricdə yaşayan və çalışan azərbaycanlı elm adamları və təhsil fədailəri üçün olduqca əlamətdar bir ay oldu. Sentyabrın 9-11-də Bakıda “Gülüstan” sarayında Dünya Azərbaycanlı Alimlər Birliyinin Forumu keçirildi. Forumun gündəliyi və dünyanın dörd bir yanından gələn azərbaycanlı alimlərin çıxışları təqdirəlayiqdir. Biz, Vətən müharibəsindən sonra Azərbaycan elmi və təhsili üçün nələr etməyin, Vətənimizə daha səmərəli xidmət göstərməyin yollarını araşdırdıq.

Əlbəttə, bütün bunlar, Sizin rəhbərliyinizdə zəfər qazanmış, torpaqlarını tamamilə azad etmiş Ordumuzun və Müzəffər Ali Baş Komandanın sayəsində gerçək olmuşdur. Sizin uzaqgörənliyinizin, Azərbaycan elminə, təhsilinə, gələcəyimiz olan gənclərə qayğınızın bir təzahürüdür. Ulu Öndərimizin 1970-ci illərin əvvəllərində başlatdığı və istedadlı gənc nəslə xitab edən təhsil proqramı sayəsində Azərbaycan yeni-yeni zirvələr fəth edir. Hər zaman Sizin qəlbən aramızda olduğunuzu hiss edirik. Sizin tapşırıqlarınız və tövsiyələriniz bizim fəaliyyətimizə istiqamət verir. Forumun kulminasiya nöqtəsi Xankəndiyə səfər və orada verdiyimiz bəyanat oldu. Əgər bir il bundan əvvəl Sizin rəhbərliyinizlə antiterror tədbirləri keçirilməsəydi və yadelli işğalçılar bu torpaqlardan atılmasaydı bizim belə imkanımız olmayacaqdı. Ona görə, Azərbaycan alimləri Sizə minnətdardır.

Yeni fəaliyyətə başlayan Qarabağ Universiteti isə bir başqa əfsanədir. Bu Universitet Sizin əsərinizdir, Vətənimizin elm və təhsil sahəsindəki inkişaf yolunda uğurla irəliləməsinə mühüm töhfədir. Xaricdə yaşayan və çalışan, amma Vətəni ilə bağlarını heç bir zaman itirməyən biz elm adamlarına bunları yaşatdığınız üçün Sizə borcluyuq.

Uca Yaradan Sizi və Vətənimizi qorusun.

Yaşasın əbədi Azərbaycan!

Hörmətlə,

Əmirulla Məmmədov, Azərbaycan Respublikasının Əməkdar elm xadimi, dövlət mükafatı laureatı, Türkiyə-Azərbaycan Dostluq İşbirliyi və Dayanışma Vəqfinin Qəyyumlar Şurasının üzvü, doktor, professor,

Emil Əhmədov, Moskva Fizika-Texniki İnstitutunun L.Landau adına Nəzəri fizika kafedrasının müdiri, doktor, professor,

Toğrul Talışinski, ABŞ-ın “ST.Joseph’s Health” xəstəxanasında Robotik-minimal invaziv cərrahiyyə bölməsinin direktoru, doktor, professor.

Türkiyə Respublikası, Ankara şəhəri.