Böyükbəy Ağayevdən, Ağsu, Azərbaycan

Möhtərəm cənab Prezident.

Azərbaycan xalqının Ümummilli Lideri Heydər Əliyev tərəfindən təməli qoyulan siyasi-iqtisadi, sosial-mədəni, hərbi-hüquqi strategiya Sizin tərəfinizdən durmadan inkişaf etdirilir. Buna misal olaraq, Azərbaycanın beynəlxalq aləmdə qazandığı uğurları, vətəndaşların sosial rifah halının yüksəlməsini, ərazilərimizin düşməndən azad edilməsini, tibbi sığortanın tətbiqini, elm, təhsil, səhiyyə, mədəni, ictimai və s. sahələrdə əldə etdiyimiz nailiyyətləri göstərmək olar. Bu nöqteyi-nəzərdən Azərbaycan səhiyyəsində baş verən mütərəqqi tərəqqi də diqqəti cəlb edir. Tibb müəssisələrinin təmir olunaraq və ya yenidən tikilərək Azərbaycan vətəndaşlarının ixtiyarına verilməsi ölkəmizin davamlı və dayanıqlı inkişafının bariz nümunəsidir. Respublikanın rayonlarında müxtəlif istiqamətli yeni və müasir diaqnostika mərkəzlərinin yaradılması, xəstəxanaların açılması, vətəndaşlara göstərilən tibbi xidmətlərin artırılması, o cümlədən dünyanın ən qabaqcıl müəssisələrində istehsal olunan tibbi avadanlıqların alınıb gətirilərək quraşdırılması, gənc kadrların hazırlanması gələcəyə olan inamı daha da artırır. Məhz bu baxımdan respublikamızda ən çətin tibbi əməliyyatların həyata keçirilməsinə imkan yaranmışdır. Dövlətin vətəndaşlarına olan diqqət və qayğısının məntiqi nəticəsi olaraq, dövlət xəstəxanalarında xəstələr müayinə və müalicə edilir, dərman preparatları ilə pulsuz təmin olunur, ən əsası isə özəl xəstəxanalarda çətin və ağır əməliyyatların aparılması xərcləri dövlət tərəfindən ödənilir. Bu, tibbi sığorta nəticəsində əldə olunmuşdur. Demək, Azərbaycan vətəndaşı tutduğu sosial vəzifədən, maliyyə imkanlarından asılı olmayaraq öz sağlamlığına qovuşa bilər. Bütün bunlar Sizin sosialyönümlü islahatlarınızın tərkib hissəsi olaraq həyata keçirilir.

Cənab Prezident, xalqımıza göstərilən yüksək xidmətə görə Sizə və Mehriban xanım Əliyevaya ailəm adından, Ağsu rayonunun Ağabəyli kənd sakinləri adından, şəxsən öz adımdan təşəkkürümü bildirirəm.

Allah Sizi qorusun.

Hörmətlə,

Ağayev Böyükbəy.

Azərbaycan Respublikası, Ağsu rayonu, Ağabəyli kəndi.