Əfqan Salmanovdan, Xarkov, Ukrayna

Hörmətli cənab Prezident.

Sizi BMT-nin İqlim Dəyişikliyi üzrə Çərçivə Konvensiyasının Tərəflər Konfransının 29-cu sessiyasının (COP29) yüksək səviyyədə təşkili və uğurla keçirilməsi münasibətilə səmimi-qəlbdən təbrik edir, Azərbaycan adına gördüyünüz belə möhtəşəm işlərə görə bir azərbaycanlı olaraq təşəkkürümü çatdırıram. Bu əlamətdar tədbir Azərbaycanın beynəlxalq arenadakı mövqeyini daha da gücləndirməklə yanaşı, qlobal əhəmiyyət daşıyan iqlim məsələlərində liderlik rolunu təsdiqlədi.

Sizin rəhbərliyiniz altında Azərbaycan Respublikası iqlim dəyişikliyi ilə mübarizədə və davamlı inkişaf məqsədlərinə çatmaqda əhəmiyyətli töhfələr verməyə davam edir. COP29 çərçivəsində qəbul olunan qərarlar və təqdim edilən təşəbbüslər Azərbaycanın bu sahədəki irəliləyişlərinin və qlobal məsuliyyətinin bariz göstəricisidir.

Azərbaycanın Xarkov şəhərində fəxri konsulu olaraq, ölkəmizin belə bir mühüm beynəlxalq tədbirə ev sahibliyi etməsindən böyük qürur hissi duyuram. Bu uğurlar, əminəm ki, həm Azərbaycan xalqının rifahına, həm də dünya ictimaiyyətinin gələcəyinə müsbət təsir göstərəcək.

Zati-aliləri, Sizə möhkəm cansağlığı, ali dövləti fəaliyyətinizdə yeni uğurlar, Azərbaycan xalqına isə sülh, tərəqqi və rifah arzu edirəm.

Dərin hörmət və ehtiramla,

Əfqan Salmanov,

Azərbaycan Respublikasının Xarkov şəhərində fəxri konsulu.

Ukrayna, Xarkov şəhəri.