34 nömrəli tam orta məktəbin kollektivindən, Gəncə, Azərbaycan

Hörmətli cənab Ali Baş Komandan!

Gəncə şəhəri Samir Vəliyev adına 34 nömrəli tam orta məktəbin kollektivi olaraq, ilk növbədə, Sizə çətin və şərəfli işinizdə uğurlar arzulayırıq.

Sizin, doğma Azərbaycanımızın inkişafı və dünyada tanınması uğrunda apardığınız işlər əvəzsizdir. Xalqımızın firavan yaşaması, torpaqlarımızın azad olunması, Qarabağın inkişafı və çiçəklənməsi bizi daha da həvəslə işləməyə ruhlandırır. Azərbaycan təhsilinin inkişafına, müəllimlərin əməyinə verilən qiymət də təqdirəlayiqdir. Azərbaycanda yüksək intellektli, vətənpərvər, milli adət-ənənələrə malik gənc nəsil yetişir. Bütün bunlar Sizin apardığınız məqsədyönlü siyasətin nəticəsidir.

Azərbaycanımızı dünyada tanıtmaq məqsədilə görülən tədbirlər sırasında növbəti böyük idman yarışına ev sahibliyi etməyimizin böyük əhəmiyyəti vardır. III MDB Oyunlarına ev sahibliyi etməklə dünya ictimaiyyətinə ölkəmizin mühüm töhfələr verə biləcəyini bir daha nümayiş etdirəcəyik. Azərbaycanın MDB Oyunları kimi əhəmiyyətli bir idman tədbirinə ev sahibliyi etməsi onun idman ölkəsi kimi nüfuzunu daha da artıracaq. Eyni zamanda, Azərbaycanın mədəniyyətini, tarixini, qazandığı uğurları təbliğ etmiş olacağıq.

III MDB Oyunlarının mərkəzi olaraq, bizim doğma şəhərimiz - Gəncənin seçilməsi bizi çox sevindirdi və qürurlandırdı. Doğma şəhərimizə göstərdiyiniz qayğıya və diqqətə görə Sizə təşəkkür edirik.

Hörmətlə,

Samir Vəliyev adına 34 nömrəli tam orta məktəbin kollektivi.

Azərbaycan Respublikası, Gəncə şəhəri.