Azərbaycan Respublikasının Prezidenti Zati-aliləri cənab İlham Əliyevə
Hörmətli cənab Prezident.
Fürsətdən istifadə edərək, 60 illik yubileyiniz münasibətilə Sizi təbrik etmək imkanından çox məmnunam.
Hələ 1993-cü ildə, atanız, ümummilli liderimiz Heydər Əliyev hakimiyyətə qayıtdığı dövrdə, dövlətimiz və xalqımız öz tarixinin ən ağır günlərini yaşayırdı, olum və ya ölüm dilemması, müstəqilliyimizin itirilməsi və dövlətçiliyin süqutu təhlükəsi qarşısında idi.
Ölkəmizin bu bəlalardan xilas edilməsinə, yeni dövlət modelinin qurulmasına, müasir və güclü ordu yaradılmasına, işğal olunmuş ərazilərimizin azad edilməsinə nail olmaq - bütün bunlar xüsusi tarixi bir missiyadır və yalnız görkəmli liderlərin şəxsi bacarığı sayəsində həyata keçirilir.
Ulu Öndərin başladığı və Sizin uğurla davam etdiyiniz bu tarixi missiyanın parlaq nəticələri fəxr və heyranlıq hissi doğurur. Ali Baş Komandan kimi rəhbərliyiniz altında müzəffər Ordumuzun əldə etdiyi tarixi Zəfər xalqımıza təkcə işğal olunmuş əraziləri deyil, həm də özünə hörməti, milli qüruru və gələcəyə inamı qaytardı.
Siz qlobal güclərin hesablaşmalı olduğu Azərbaycanın dünya siyasətində layiqli yerinin və regionumuzun yeni geosiyasi reallıqlarının müəllifi oldunuz.
Bütün bu nailiyyətləri yüksək qiymətləndirərək, bir vətəndaş kimi Sizə dərin minnətdarlığımı və ehtiramımı bildirmək istəyirəm.
Hörmətli cənab Prezident, Sizi yubileyiniz münasibətilə səmimi qəlbdən təbrik edirəm. Dövlətimizin inkişafı, möhkəmlənməsi, xalqımızın firavanlığı və rifahı naminə yürütdüyünüz bu qətiyyətli fəaliyyətinizdə Sizə uğurlar diləyirəm. Sizə və bütün ailə üzvlərinizə, möhkəm cansağlığı, xoşbəxtlik və uzun ömür arzulayıram.
Dərin hörmətlə,
Eldar Namazov
Strateji və Beynəlxalq Araşdırmalar Mərkəzinin direktoru
