Azərbaycan Respublikasının Prezidenti Zati-aliləri cənab İlham Əliyevə
Möhtərəm cənab Prezident.
Ulu öndər Heydər Əliyevin əsasını qoyduğu siyasəti uğurla davam etdirməniz sayəsində ötən 18 il Azərbaycan tarixinə hərtərəfli və sürətli inkişaf dövrü kimi daxil olmuşdur. Gənc dövlətimizin əsaslarının möhkəmliyi, həyata keçirilən strategiyanın səmərəliliyi Sizin liderlik keyfiyyətləriniz, zəkanız, siyasi iradəniz sayəsində mümkün olub.
Möhtərəm Prezident, Sizin fenomenal siyasi liderlik keyfiyyətləriniz sayəsində respublikamız beynəlxalq münasibətlər sistemində mühüm yer qazanmışdır. Sizin adınız ölkəmizin inkişafı və sabitliyi ilə assosiasiya olunur. Bu, Sizin ötən 18 il ərzində ölkəmizə dünya miqyasında qazandırdığınız nüfuzun parlaq təcəssümüdür.
2020-ci ildə 44 gün ərzində 30 ilə yaxın işğal altında qalmış torpaqlarımızın azadlığı uğrunda başlatdığınız haqq savaşında Azərbaycan xalqı bir nəfər kimi Sizin ətrafınızda birləşdi. Ölkəmizdə fəaliyyət göstərən siyasi partiya və təşkilatlar öz Prezidentinin ətrafında bir yumruq kimi birləşərək düşmənə qarşı mübarizədə vahid mövqedən çıxış etdi. Bu, Sizin yürütdüyünüz demokratik, milli maraqlara əsaslanan, dövlətçiliyin qorunmasını və inkişafını özündə ehtiva edən siyasətin mühüm nəticələridir.
Cənab Prezident, son 200 illik tariximizin ən şanlı səhifəsi məhz Sizin rəhbərliyinizlə yazıldı. 44 günlük Vətən müharibəsi dövründə hər bir çıxışınız, hər bir sözünüz xalqımız üçün bir bayrama çevrildi. Kəndlərimizin, şəhərlərimizin düşmən əsarətindən azad olunması xəbərini Sizdən eşitmək böyük fərəh hissi idi. Xalqımız bu gün də həmin qürurun sevincini yaşamaqdadır. Vətən müharibəsində əldə olunan Qələbənin siyasi təməllərinin möhkəmləndirilməsi uğrunda nümayiş etdirdiyiniz fəaliyyət böyük siyasi məktəbdir. Hər bir azərbaycanlı bu mübarizədə Sizin yanınızda yer alır, Sizi dəstəkləyir.
Möhtərəm Cənab Prezident, Azərbaycan Sosial Rifah Partiyası hər zaman Sizin apardığınız böyük siyasi fəaliyyəti yaxından izləyir və dəstəkləyir. Azərbaycanımızın inkişafı, vətəndaşımızın rifahı və milli-mənəvi dəyərlərimizin qorunması istiqamətində gördüyünüz işlər yüksək dəyərləndirilir.
Sizi ad gününüz münasibətilə səmimi qəlbdən təbrik edir, Sizə fəaliyyətinizdə uğurlar arzu edir, cansağlığı diləyirik. Əminik ki, Sizin rəhbərliyinizlə öz inkişaf tarixinin yeni mərhələsini yaşayan Azərbaycan dövləti daha da inkişaf edəcək, güclənəcək. Sizin "Qarabağ Azərbaycandır" və "Biz birlikdə güclüyük" şüarınız Azərbaycan xalqının gələcəyə inamının ən böyük mayakıdır!
Hörmətlə,
Əsli Kazımova
Azərbaycan Sosial Rifah Partiyasının sədri.
