Azərbaycan Respublikasının Prezidenti Zati-aliləri cənab İlham Əliyevə
Cənab Prezident,
Sizi Azərbaycan Kommunist Partiyasının üzvləri adından 60 illik yubileyiniz münasibətilə səmimi qəlbdən təbrik edirik.
Yubileyinizin bütün respublikada qeyd olunmasını, sözün tam mənasında, Qarabağın azad edilməsində qazanılan Qələbənin, respublikanın ərazi bütövlüyünün nurunun həmişəlik parlamasında böyük rolu və payı olan Azərbaycan Prezidenti və müzəffər Ali Baş Komandan İlham Əliyevə xalqın istəyi kimi başa düşürük.
2020-ci ilin sentyabr ayında düşmən erməni ordusu növbəti dəfə ərazilərimizə ciddi təhlükə yaratdıqda Siz mərdliklə dəyanət göstərib cəsarətli ordumuza hücum əmrini verdiniz. Rəşadətli ordumuz cəsarət və qəhrəmanlıq göstərib işğal olunmuş ərazilərimizi azad etdi.
Respublikanın ərazi bütövlüyünün təmin olunması böyük əqidəli, müasir dünyagörüşlü xalqın müzəffər Ali Baş Komandan İlham Əliyevə olan inamı və əsgərlərin, zabitlərin canları, qanları bahasına nail olundu. 44 günlük Vətən müharibəsində qüdrətli ordumuz düşmənə qarşı kəskin mübarizə silahını qaldırdı və qətiyyətlə Zəfər qazanıb ərazilərimizi işğaldan azad etdi.
Hesab edirik ki, respublikamızın yazıçı və şairləri öz əsərlərində 2020-ci il sentyabr ayının 27-də Vətən müharibəsinin başlanğıcının geniş panoramını verəcəklər, xalqımızın həmin dövrdə istək və arzularını, respublika əhalisinin qələbə əzmli ab-havasını bütün dolğunluğu ilə əks etdirəcəklər.
Sosial-iqtisadi tərəqqinin keyfiyyətcə yeni mərhələsində Azərbaycan Respublikasının başlıca məqsədlərindən biri də ictimai həyatın bütün sahələrinin modernləşdirilməsi yolu ilə inkişaf etmiş ölkələr sırasına daxil olmaqdır. Təcrübə göstərir ki, konkret hədəflərə əsaslanan strategiya və baxışlar sistemi olmadan iqtisadı sahədə yüksək nəticələrin qazanılması və perspektiv vəzifələrin reallaşdırılması qeyri-mümkündür. Bu və digər hədəfləri uğurla gerçəkləşdirmək isə dərin iqtisadi təfəkkürə malik güclü siyasi liderlər sayəsində mümkün olur.
Bizim əsrimizdə müxtəlif sahələrdə cəmiyyətin fəaliyyətinə rəhbərlik etmək genişmiqyaslı təşkilatçılıq qabiliyyəti ilə yanaşı, böyük zəka, dərin ağıl, zəngin bilik, hörmət, nüfuz tələb edir. Bu xüsusiyyətlərə malik olan Prezident, müzəffər Ali Baş Komandan İlham Əliyevə məğrurluq, dəyanət və təmkinlilik, xalqımız və dövlətimiz naminə fəaliyyətinin bütün istiqamətlərində uğurlar və möhkəm cansağlığı arzulayırıq.
Hörmətlə,
Hacı Hacıyev
Azərbaycan Kommunist Partiyasının nümayəndəsi
